Pas dy vjetëve së bashku, ylli brazilian Neymar dhe klubi francez Paris Saint-Germain kanë vendosur të mos shtiren më. Të dy palët janë pajtuar për t’u ndarë, ama pa e ditur sesi ta bëjnë.
Gazeta e madhe franceze “Le Parisien” shkruan se sot, Neymar dhe Paris Saint-Germain kanë vendosur t’i ndajnë rrugët. E përditshmja spanjolle e quan historinë e tyre qesharake, të komplikuar dhe të ngjyrosur, ku palët përpiqen ta fajësojnë njëra-tjetrën për dështimin që po lulëzon, raporton Gazeta Express.
Kampioni francez ka vendosur t’i ndryshojë gjërat në klub dhe të mos lejojë me sjellje prej ylli.
Këtë e bëri të qartë presidenti Nasser Al-Khelaifi, i cili ditë më parë tha për revistën franceze, France Football, se kush dëshiron të qëndrojë në klub duhet të dëgjojë, kush nuk dëshiron është i lirë të largohet.
Ai e tha troç se PSG-ja nuk e kishte detyruar Neymarin t’i bashkohet klubit më 2017 nga Barcelona për një shumë rekorde botërore ende i pathyer, 222 milionë euro.
“Askush nuk e detyroi atë të nënshkruajë me ne. Askush nuk e shtyu. Ai erdhi i vetëdijshëm për t’iu bashkuar një projekti”, tha Al-Khelaifi.
Një mik i Neymar ka thënë: “Neymar Junior nuk është ndier i lumtur asnjëherë në Paris”. Për dy vjet, superylli brazilian i ka zhvilluar 58 ndeshje dhe i ka shënuar 51 gola. Ai është përballur me lëndime të shpeshta dhe me kritika të ashpra nga mediat.
Le Parisien thotë se ka informacione se PSG-ja ende nuk e ka pranuar asnjë ofertë për Neymarin, për të cilin kërkon një shumë jo më të vogël se 200 milionë euro. /Gazeta Express/


