Me datën 29 shtator, e enjte e muajit të kaluar, është arrestuar Drejtori i Policisë në Rajonin e Mitrovicës, Nehat Thaçi.

Arrestimi i tij është bërë pikërisht në pikën kufitare të Kosovës me Serbinë tek ‘Dheu i Bardhë’, nën dyshimin për terrorizëm.

Konfirmimin e arrestimit e kishte bërë edhe Policia e Kosovës të cilët kishin theksuar se në atë kohë në orët e vona të natës Nehat Thaçi ishte jashtë detyrës zyrtarë.

Ndërsa policia serbe kishte konfirmuar arrestimin e tij duke theksuar se për Thaçin ekzistonte një fletëarrest i lëshuar kohë më parë.

Pas ndalimit policor prej 48 orëve, Thaçit iu shqiptua masa e paraburgimit për 31 ditë në burgun e Beogradit, transmeton Indeksonline.

Motra e Drejtorit të Policisë në Rajonin e Mitrovicës, Nehat Thaçit ka folur shkurtë për Indeksonline duke theksuar se ai është mirë.

“Përmes ambasadës kemi kuptuar se është mirë, këtë të premte e kemi marrë vesh këtë gjë, pasi as ne nuk kemi tjera informata”, ka thënë motra e tij.

Gjithashtu sipas saj, familjarët nuk e dinë se “çfarë saktësisht do të ndodhë me të”.

“Për gjithçka ju kisha lut që të drejtoheni dhe të pyesni Qeverinë e Kosovës”, ka thënë ajo.

“Ne nuk kemi dashur dhe nuk duam të flasim, pra ju lutemi të gjithëve që të na e kurseni nga pyetjet”, ka përfunduar shkurt motra e Thaçit.