Shqipëria u mposht në ndeshjen e saj të parë në kampionatin evropian nga Zvicra, mirëpo vëmendja ishte tek vëllezërit Xhaka që ishin kundërshtar në fushë.

Taulant Xhaka luajti një ndeshje me plot emocione të parën në evropian, ai përveç që luajti ndaj shtetit ku u lind Zvicrës u përball edhe më vëllanëë e tij më të vogël Granitin që kishte të veshur fanellën e shtetit helvet.

Në një prononcim për Telegrafin, Taulanti foli rreth ndeshjes por edhe për përballjen që kishte me Granitin në fushë si kundërshtar.

“Emocionet e bënë të vetën, ne ishim pa përvojë dhe mendoi që kjo na kushtoi”, deklaroi Taulanti për Telegrafin.

“Goli i hershëm që pësuam na krijoi problem, por patëm raste për barazim ndërsa gabuam para portës”.

“Besoj se në dy ndeshjet e radhës do të përmirësohemi dukshëm për të arritur rezultate pozitive për kualifikim”, tha mesfushori i Baselit.

Tutje luani i Kombëtares shqiptare tregoi edhe për emocionet që kishte dhe për fjalët që i tha Graniti pas ndeshjes.

“Ishte ndeshje emocionale dhe është e natyrshme pasi kisha përballë vëllanë tim. Graniti pas ndeshjes na uroi për paraqitje të mirë dhe na uroi fat që të marrim fitore ndaj Francës”, thotë Taulanti.

Sa i përket zgjedhjes së Kombëtares ai ka dy fjalë të shkurtra. “Kam zgjedhur të luaj për Shqipërinë dhe jam i lumtur me këtë gjë, nuk mendoj për Zvicrën”, përfundoi mesfushori 25 vjeçar. /Telegrafi/