Sulmuesi argjentinas nuk e ka të sigurt qëndrimin në Torino as pak ditë para mbylljes së afatit kalimtar
Paulo Dybala nuk e ka ende të sigurt qëndrimin në Juventus, edhe pse kanë mbetur vetëm pak ditë para përfundimit të afatit kalimtar të verës.
Ylli argjentinas përfundoi në bankinë në ndeshjen e së shtunës ndaj Parmës, në hapje të sezonit të ri në Serie A, shkruan Gazeta Express.
Ky ishte një sinjal nga trajneri Maurizio Sarri se ish-futbollisti i Palermos mund të jetë rezervist edhe në sezonin e ri.
Interesim për Dybalan gjatë kësaj vere kishin shfaqur klubet e njohura evropiane si Paris Saint-Germain, Tottenham e Manchester United.
Mirëpo, sulmuesi argjentinas kishte preferuar më shumë të qëndrojë në Torino, edhe pse klubi dëshironte ta shiste.
Sidoqoftë, Tuttosport raporton se 25 vjeçari ka mbetur i shokuar me vendimin që të përfundojë në bankinë dhe brengoset se as këtë sezon nuk do të ketë rol të rëndësishëm tek Bardhezinjtë.
Prandaj, Dybala mund të transferohet në Paris, ku me gjasë mund ta zëvendësojë Neymarin, i cili pritet të transferohet në La Liga. /Gazeta Express/