EULEX-i i ka kërkuar policisë holandeze që menjëherë ta arrestoj mjekun turk, Yusuf Sonmez, i akuzuar për rastin “Medicus”, i cili pritet të ekstradohet në Kosovë.
Gazeta beogradase “Blic” thekson se Qeveria e Holandës po bën të gjitha përpjekjet për të arrestuar të ashtuquajturin “Dr. Vdekja”, i cili u lokalizua javën e kaluar nga Prokuroria serbe e Krimeve të Luftës, transmeton Telegrafi.
Dr. Sonmez ka të ngjarë, kur të arrestohet të ekstradohet në Kosovë, sepse ndaj tij kanë filluar procedura në rastin e ‘Medicus’ – tregti të paligjshme të organeve.
Siç raportoi e përditshmja serbe, “Kurir”, Sonmez është zbuluar se jeton në kryeqytetin holandez të Amsterdamit, pas bashkëpunimit me një dëshmitar, ku prokuroria serbe kishte kontaktuar me mjekun turk përmes e-mail, duke u paraqitur si palë e interesuar për blerjen e veshkave, transmeton Telegrafi.
Rreth gjetjes së “Dr Vdekja” është informuar menjëherë edhe Jonathan Ratel, kryeprokurori i EULEX-it në Kosovë. /Telegrafi/
