Borussia Dortmundi ka vazhduar me rekordin e qind për qindtë në Bundesliga. Në xhiron e pestë BVB e ka mposhtur Bayer Leverkusenin me rezultat 3-0 në Signal Iduna Park.

Pas një harkimi të gjatë, portieri mysafir gaboi rëndë dhe Jonas Hofmann realizoi (19’). Ky ishte goli i vetëm i gjysmës së parë.

Shinji Kagawa e dyfishoi epërsinë (58’), ndërsa Pierre-Emerick Aubameyang e vendosi rezultatin përfundimtar nga pika e bardhë (74’).

Në këtë ndeshje u aktivizuan dy lojtarë shqiptarë. Te Leverkuseni pas pushimit u inkuadrua Admir Mehmedi, kurse te Dortmundi në minutën e 64 hyri në fushë Adnan Januzaj, i cili e humbi një rast shumë të mirë për t’u bërë protagonist.

Me këtë fitore, Borussia Dortmundi ngjitet në krye të tabelës me pikë të barabarta me Bayern Munichun, nga 15-të. /Telegrafi/