Lëvizjen Vetëvendosje e ka lëshuar edhe një ish-kandidate për deputete, tash asambliste në Kuvendin Komunal të Vitisë, Majlinda Ostrogllava.

Ostrogllava ka qenë kandidate për deputete nga Lëvizja Vetëvendosje në zgjedhjet e fundit nacionale.

Ajo ka thënë se vendimin për tu larguar nga Vetëvendosje e për shkak që ish-partia e saj është duke përbuzur sakrificën e aktivistëve, duke marr vendime në kundërshtim me vullnetin e tyre.

“Si pasojë e vendimeve të fundit të imponuara nga niveli qendror, jam detyruar të marr vendim që aktivitetin politik si përfaqësuese e qytetarëve në Kuvendin Komunal të Vitisë ta vazhdoj e pavarura. Këto vendime janë në kundërshtim me vullnetin e simpatizantëve, aktivistëve dhe përfaqësuesve të Lëvizjes në Viti, dhe kanë përmbyll një proces që e ka ndryshuar përfundimisht Lëvizjen e Vitisë. Lëvizja në Viti më nuk mund të jetë subjekt që përfaqëson ndryshimin, por ka përbuzur sakrificën e aktivistëve të saj në këtë komunë dhe është vënë në shërbim të plotë të individëve dhe grupeve që kanë përgjegjësi për gjendjen e rëndë të Vitisë, në të gjitha aspektet”, ka thënë Ostrogllava.

Ajo ka bërë të ditur se aktivitetin e saj politik do ta vazhdojë si e pavarur, duke mohuar se do t’i bashkohet ndonjë subjekti politik.

“Po ashtu i bëjë me dije të gjithë qytetarët e Vitisë do të jem plotësisht e pavarur dhe informatat se gjoja po i bashkohemi ndonjërës nga subjektet politike janë plotësisht të pavërteta. Ashtu siç kam vepruar deri më tani, do të vazhdoj të mbrojë interesat e qytetarëve dhe të kundërshtojë çdo veprim të dëmshëm nga kushdo që vije”. /BotaSot/