Donis Avdijaj i është përgjigjur negativisht ftesës së përzgjedhësit të kombëtare shqiptare, Gianni de Biasi, për ndeshjen miqësore ndaj Francës.

Lojtari me origjinë shqiptare i lindur në Osnabruck të Gjermanisë dhe produkt i shkollës së famshme të futbollit Schalke 04, prej kohësh është një nga dëshirat e tifozëve të Kombëtares Shqiptare.

Ai më herët ka refuzuar përfaqësuesen U21 të Shqipërisë, duke thënë se dëshiron të luajë vetëm me kombëtaren A, por duket se as kjo nuk e kënaq atë.

Trajneri De Biasi ka zbuluar se ai e ka ftuar Avdijajn për ndeshjen e radhës, por menaxheri i tij është arsyetuar se lojtari është i lodhur nga sezoni i fundit, të cilin e ka kaluar te Sturm Graz.

“Avdijajn e kam thërritur për këtë ndeshje pasi dëshiroj ta integroj me grupin dhe ambientin”, ka zbuluar De Biassi në konferencën për shtyp, tranmseton Telegrafi.

“Menaxheri i tij më tha që është i lodhur nga sezoni pasi ka pasur probleme fizike gjatë edicionit dhe nuk mund të vijë në këtë grumbullim”.

“Këtë më tha menaxheri i tij por mendoj se ai nuk dëshiron të vijë me ne”, ka thënë De Biasi. /Telegrafi/