Një ndeshje fantastike është zhvilluar në Old Trafford ndërmjet Manchester Unitedit dhe Arsenalit, me ç’rast skuadra vendase fitoi me rezultat 3-2.
Pjesa e parë kishte të bëjë me talentin Marcus Rashford, i cili realizoi dy gola të shpejtë (29’ dhe 32’) për ta elektrizuar atmosferën në stadium.
Topçinjtë i riktheu në lojë Daniel Welbeck (40’) falë një harkimi të Ozil dhe skuadrat shkuan në pushim me rezultat 2-1.
Ander Herrera pranoi një top nga Rashford dhe goditi mrekullueshëm drejt portës, ndërsa topi i devijuar u ndal në rrjet (65’).
Porse Mesut Ozil reagoi shumë shpejt për t’i mbajtur vizitorët në lojë (69’). Megjithatë, deri në fishkëllimën e fundit të arbitrit nuk pati gola të tjerë, ashtu që Djajtë e Kuq dolën fitues.
Këtë supersfidë e shijoi edhe mesfushori shqiptar, Adnan Januzaj, i cili u inkuadrua nga minuta e 80-të (në vend të Marcus Rashford).
Fitorja e pozicionon Manchester Unitedin në vend të pestë me 44 pikë, shtatë më pak se Arsenali që është i treti në tabelë. Ekipi i Arsene Wenger mbetet pesë pikë prapa liderit Leicester City. /Telegrafi/
