Deputetja e Kuvendit të Kosovës nga radhët e Partisë Demokratike të Kosovës, Selvie Halimi, ka ngritur sot në seancën e Kuvendit të Kosovës çështjen e rregullimit të shtratit të lumit Sitnica.
Ajo ka kërkuar nga kryeministri i Kosovës dhe ministri i Mjedisit që të fillojnë implementimin e projektit për rregullimin e shtratit të lumit Sitnica në Komunën e Lipjanit sa më parë. “Projekti detaj është hartuar nga komuna në mbështetje prej USAID para 2 – 3 vite. Ky projekt është i kushtueshëm rreth 10 milionë euro. Por, në bashkëpunim të komunës dhe qeverisë, si dhe me gjetjen e ndonjë donacioni ky projekt do të kishte mundësi të realizohej në faza. Me këtë ju i ndalni humbjet që shkaktohen nga dalja e shtratit të lumit çdo vit në kohë të reshjeve, të cilat humbje po dijnë të jenë edhe të pakompensueshme si rasti i fundit që ndodhi”, ka thënë deputetja Halimi. /LipjaniNews/