Kryeministri Albin Kurti dhe Presidentja Vjosa Osmani kanë udhëtuar drejt Uashingtonit në SHBA, për nënshkrimin e marrëveshjes me MCC-në si dhe për një takim me Sekretarin e Shtetit Antony Blinken.
Departamenti i Shtetit ka njoftuar se ky takim, sipas kohës lokale në Uashington, do të mbahet në ora 16:30, që sipas kohës lokale në Kosovë, i bije në ora 22:30.
Presidentja e Kosovës Vjosa Osmani ka njoftuar sot po ashtu, se në kuadër të vizitës në Shtetet e Bashkuara të Amerikës, do të priten nga Sekretari Amerikan i Shtetit, Antony Blinken, duke thënë se do të thellohet partneriteti strategjik me SHBA-në, megjithatë nuk janë bërë të ditura paraprakisht temat që mund të diskutohen.
“Së bashku me kryeministrin Kurti, në këtë takim do të fokusohemi në thellimin e partneritetit strategjik me SHBA, duke adresuar sfidat me të cilat po ballafaqohet rajoni ynë, reformat që po i ndërmarrin institucionet tona si dhe fuqizimin e pozicionit ndërkombëtar të Kosovës”, ka njoftuar Osmani.
“Kosova është e bekuar me miqësinë dhe përkrahjen e Shteteve të Bashkuara”, ka përfunduar Osmani./GazetaExpress
