Përzgjedhësi i Rusisë, Fabio Capello, mendon se Cristiano Ronaldo nuk i posedon aftësitë teknike që i ka Lionel Messi.

Në vitin e kaluar (kur e fitoi Topin e Artë) dhe këtë vit, portugezi e ka kaluar rivalin e tij kryesor dhe është sërish favorit për ta fituar çmimin prestigjioz të lojtarit më të mirë në botë.

Strategu italian ka respekt të madh për fuqinë eksplozive të 29-vjeçarit, porse nuk beson se ai është i shkathët si argjentinasi, njofton Telegrafi.

“Cristiano Ronaldo dhe Messi janë dy lojtarë të jashtëzakonshëm, por janë të ndryshëm. Cristiano është lojtar i fuqishëm, me teknikë shumë të mirë, por ai nuk e posedon shkathtësinë e pastër teknike të Messit”.

“Leo Messi është një kundërshtar shumë i vështirë për ta përballuar”, ka deklaruar ish-trajneri i Real Madridit.

Ndryshe, në një deklaratë të mëhershme, Capello ka thënë se kishte dashur ta transferonte 27-vjeçarin te Juventusi në vitin 2005. /Telegrafi/