Mbrojtësi i Juventusit dhe Italisë, Giorgio Chiellini, ka thënë se bashkëlojtari i vet portugez, Cristiano Ronaldo, i cili u infektua me koronavirus të martën, ndihet i qetë dhe po çlodhet duke marrë rreze dielli.

Sulmuesi i Juventusit Ronaldo doli pozitiv në testin për Covid-19 të martën mbrëma në kampin portugez dhe do të mungojë dy javë si pasojë, transmeton Gazeta Express.

35-vjeçari nuk ka simptoma të virusit dhe po e ndjek protokollin, që nënkupton se ai është vetizoluar dhe nuk mund të luajë për Portugalinë sonte kundër Suedisë në Ligën e Kombeve.

“Cristiano është mirë, ai është i qetë dhe po rrezitet në diell. Ai do të kthehet kur të bëjë mirë”, tha Chiellini i pyetur për Ronaldon.

Për 35-vjeçarin foli edhe trajneri i Portugalisë, Fernando Santos, i cili tha se Ronaldo dëshiron të kthehet në fushë sa më shpejt.

“Ai thotë se thjesht dëshiron të luajë”, tha Santos në një konferencë për media para ndeshjes kundër Suedisë.