Komuna po planifikon t’ua marrë banesat atyre që i kanë braktisur ato pa njoftuar autoritetet. Së paku 3 familje, banorë në ndërtesën e banimit kolektiv në Magurë të Lipjanit, kanë mbyllur për banim banesat e tyre dhe kanë ikur pa lënë asnjë gjurmë.
Destinimi i largimit të tyre nuk është ende i qartë plotësisht, ndërsa autoritetet komunale të Lipjanit kanë dhënë edhe ultimatume për rikthim familjesh ose marrje banesash.
Madje drejtori i Shëndetësisë në Lipjan, Avdullah Fazliu, ka thënë se ka dërguar shkresë edhe në Stacionin policor rreth këtij rasti dhe ka kërkuar që të hyhet në banesa ku askush nuk përgjigjet, derisa ato janë dhënë në shfrytëzim dhe janë pronë komunale.
“Tri familje i kanë mbyllur banesat në objektin e banimit kolektiv në Magurë dhe nuk janë aty, ndërsa ne kemi bërë kërkesë edhe në polici që t’i hapim dyert, sepse nuk përgjigjet askush brenda tyre dhe kanë mbetur me gjasë të pashfrytëzueshme nga familjet që i kishin përfituar në shfrytëzim.
Ne e kemi dhënë një ultimatum dhe pas mospërgjigjes do të veprojmë me polici, sepse kemi mjaft familje që kanë nevojë për strehim”, ka thënë Fazliu, shkruan sot më gjerësisht Koha Ditore.
