Philippe Coutinho dhe Barcelona mund të ndahen përfundimisht gjatë verës që vjen.

Mesfushori brazilian është i huazuar në Aston Villa dhe klubi anglez po planifikon ta blejë përfundimisht kartonin e tij.

Trajneri Steven Gerrard e do në ekip sa më gjatë të jetë e mundur ish-futbollistin e Interit, Espanyolit, Liverpoolit e Bayern Munichut.

Përfaqësuesi brazilian ka nisur ta rikthejë formën e dikurshme në Premierligë, shkruajnë mediat britanike dhe ato spanjolle, përcjell “Gazeta Express”.

Ai ka marrëveshje totale me Aston Villën, por tash mbetet që të gjendet gjuha e përbashkët në mes të klubeve.

Coutinho nuk e ka gjetur kurrë formën optimale në “Camp Nou” dhe në Kataluni konsiderohet si një dështim dhe dëshpërim.

Prandaj, ai mund të largohet nga “Blaugrana” pa lënë gjurmë dhe mungesa e tij nuk do të ndihet në ekipin e Xavi Hernandezit.

Futbollisti kreativ dikur ishte njëri prej mesfushorëve më të mirë në futbollin evropian, sidomos në periudhën kur luante në Liverpool. /Gazeta Express/