Ish- kandidati për kryetar të Prishtinës nga Lidhja Demokratike e Kosovës, Arban Abrashi e ka çuar në Kushtetuese zgjedhjen e Shpend Ahmetit për Kryetar të kryeqytetit, e cila ka të bëj me vlerësimin e zgjedhjeve të raundit të dytë të balotazhit në Prishtinë.
Ai thotë se ky vendim ka ardh pas një pune disa mujore me ekspertë vendorë dhe ndërkombëtarë, duke u bazuar në bazë të dy neneve ku pretendon se janë shkelur.
“Pas një punë disa mujore të ekspertëve vendorë dhe ndërkombëtarë i cili ka qenë në bashkëpunim me një universitet, e kemi dërguar në kushtetuese për vlefshmërinë e rundit dyte. Jem bazuar në dy nene të kushtetuese ku mendojmë se janë shkel gjatë këtij procesi”, ka thënë ai për Express.
Shpend Ahmeti që kishte garuar nga Lëvizja Vetëvendosje, ka dalë fitues i zgjedhjeve për kryetar të Prishtinës, duke marrë edhe mandatin e dytë për ta drejtuar kryeqytetin.
Ahmeti fitoi këto zgjedhje pas numërimit të votave me kusht, me postë dhe personave me aftësi të kufizuara.
Ai mori 861 vota, ndërsa Arban Abrashi i LDK-së ka marrë 733 vota – 19 fletëvotime kanë qenë të pavlefshme, ndërsa tri fletëvotime bosh.
Në raundin e balotazhit Ahmeti kishte marrë 41 mijë e 401 kurse kundërkandidati i tij nga LDK , Arban Abrashi kishte 41 mijë e 164./Express