Strategu italian, Carlo Ancelotti, thotë se nuk i pëlqejnë ndeshjet e Bayern Munichut, kur kihet parasysh mungesa e konkurrencës në Bundesliga.
Ish-trajneri i Real Madridit, aktualisht pa klub, është lidhur me postin e trajnerit të bavarezëve në rast të largimit të Pep Guardiolas, por duket se nuk është i interesuar për të punuar në kampionatin gjerman.
“Bayern Munichu do ta fitojë Bundesligan me duart në xhepa. Më duhet të pranoj se nuk më pëlqejnë ndeshjet e Bayernit, sepse ka shumë pak konkurrencë”.
“Megjithatë, Pep Guardiola është trajneri më i mirë në qarkullim. Ai ligjëron futbollin, e bën veten të kuptueshëm dhe fiton”, ka deklaruar Ancelotti.
Kujtojmë që italiani gjatë karrierës së tij ka drejtuar skuadra në të gjitha top-ligat, pos Gjermanisë dhe i ka fituar titujt në Serie A, Ligën Premier dhe Ligue 1, si dhe tri herë Ligën e Kampionëve. /Telegrafi/