Carlo Ancelotti nuk ka mundur ta fsheh dëshpërimin e tij derisa po e shikonte Real Madridin e tij duke pësuar debakël nga Barcelona në humbjen e mbrëmshme, 0:4.
Vizitorët e siguruan një fitore të rëndësishme në “Santiago Bernabeu” pasi e dominuan lojën që nga fillimi e deri në fund.
Reali luajti pa Karim Benzeman, por trajneri italian thotë se nuk ka arsyetim për paraqitjen e zbehtë, ndërsa e mori përgjegjësinë e plotë për këtë humbje, shkruan “Gazeta Express”.
“Është e vështirë pasi kjo është një El Clasico, shumë e rëndësishme për tifozët. Është një goditje, ne e humbëm betejën, por e kemi ende avantazhin dhe duhet të qëndrojmë të qetë dhe t’i presim lojtarët e lënduar”, deklaroi Ancelotti pas lojës.
“Ne ishim të panjohur, gjithçka shkoi keq, duhet ta harrojmë këtë lojë dhe të shikojmë përpara, e kemi një shkëputje të madhe në ligë. Unë, trajneri, kam faj”, përfundoi ish-trajneri i Juventusit, Milanit, Chelseat, Paris Saint-Germainit e Evertonit.
Edhe pse u deklasua nga Barcelona, Reali është favorit absolut për ta fituar titullin e kampionit në La Liga.
“Los Blancos” i kanë nëntë pikë më shumë se Sevilla, ndërsa Barça është tri pikë prapa ekipit andaluzian.
Pushimi për ndeshjet e kombëtareve do të jetë një mundësi që ekipi i Ancelottit të pushojë dhe t’i mbush bateritë për ndeshjen e 2 prillit që do ta zhvillojë ndaj Celta Vigos. /Gazeta Express/
