Një aksident tragjik trafiku ka ndodhur sot në rrugën “Edmond Hoxha”, përballë Sallës “1 Tetori” në Prishtinë, ku janë përfshirë një veturë dhe një motoçikletë.

Policia e Rajonit të Prishtinës ka konfirmuar se drejtuesi i motoçikletës ka humbur jetën si pasojë e plagëve të marra.

Zëdhënësi i Policisë për kryeqytetin, Enis Pllana, tha për Telegrafin se ekipet emergjente mjekësore kanë konstatuar në vendin e ngjarjes se viktima, mashkull, ishte pa shenja jete.

“Në aksident janë përfshirë një veturë dhe një motoçikletë. Si pasojë e aksidentit, drejtuesi i motoçikletës ka humbur jetën. Njësia e Trafikut të Kryeqytetit ka dalë në vendin e ngjarjes dhe ka nisur një hetim lidhur me rrethanat e këtij aksidenti”, deklaroi Pllana./Telegrafi/