Më shumë se 5.5 milionë njerëz në mbarë botën vdesin para kohe çdo vit si pasojë e ndotjes së ajrit, kjo sipas një studimi të ri, transmeton Klan Kosova.
Shumica e këtyre vdekjeve ndodhin në ekonomitë në zhvillim të shpejtë të Kinës dhe Indisë.
Faktori kryesor është emetimi i grimcave të vogla nga termocentralet, fabrikat, automjetet dhe nga djegia e qymyrit dhe drurit.
Të dhënat janë pjesë e “Global Burden of Disease Project”. Studiuesit e përfshirë në këtë iniciativë thonë se statistikat tregojnë se sa larg dhe sa shpejt duhet të ecin disa vende për të siguruar ajër të pastër për qytetarët e tyre, transmeton Klan Kosova.
“Në Pekin dhe Delhi në një ditë me ajër të ndotur, numri i grimcave është më i lartë se 300 mikrogramë për metër kub”, shpjegoi Dan Greenbaum nga Instituti i efekteve shëndetësore, në Boston, SHBA.
“Numri duhet të jetë rreth 25 ose 35 mikrogramë.”
Thithja e pjesëzave të vogla të lëngshme ose të ngurta mund të rrisin rrezikun e sëmundjeve të zemrës, goditjes, ankesat e frymëmarrjes dhe madje edhe kancer.
Dhe ndërsa vendet e zhvilluara kanë bërë përparime të mëdha në trajtimin e këtij problemi në dekadat e fundit, numri i qytetarëve që vdesin si pasojë e cilësisë së ajrit të dobët në vendet në zhvillim është ende në ngritje.
Sipas studimit, ajri i ndotur shkakton më shumë vdekje se faktorët e tjerë si kequshqyerja, obeziteti, alkooli apo droga, dhe seksi i pasigurtë. The Global Burden of Disease Project e vendos atë në rrezikun e katërt më të madh pas tensionit të lartë, rrezikut ushqimor dhe duhanit.
