Asociacioni i Gazetarëve të Kosovës është alarmuar pas sulmit të radhës ndaj një ekipi medial në veri të vendit. Sot është sulmuar me gurë vetura e ekipit të Klan Kosovës.
Nga lëndimet e marra nga sulmi, gazetarja Qendresa Bellagoshi dhe vozitësi Elsad Sinani, siç njofton AGK-ja janë hospitalizuar.
Reagimi i plotë i AGK-së
Alarmuese: Ekipi i Klan Kosovës hospitalizohet pas sulmit me gurë nga persona të maskuar në Zupç
Në një trend alarmues, AGK-ja është njoftuar sot për një tjetër sulm të rëndë kundër gazetarëve që po raportojnë nga veriu i vendit.
Persona të maskuar e kanë sulmuar ekipin e Klan Kosovës në Zubin Potok.
Ekipi i përbërë nga gazetarët Qëndresa Bellagoshi, Drin Demiri, kameramani Agon Bejtullahu dhe shoferi Elsad Sinani, janë sulmuar sot në fshatin Zupç. Gazetarja Bellagoshi dhe shoferi Sinani kanë marrë trajtim mjekësor, pasi që xhamat e veturës së thyer nga gurët i kanë goditur në fytyrë. Teksa, Demiri dhe Bejtullahu kanë shpëtuar pa lëndime.
Për rastin është njoftuar edhe Policia e Kosovës.
Sulmet e vazhdueshme përbëjnë kërcënim serioz për sigurinë e gazetarëve dhe pengojnë raportimin për zhvillimet në veri. Andaj, AGK-ja, kërkon nga KFOR-i dhe EULEX-i që të luajnë rol shtesë për të garantuar sigurinë fizike të gazetarëve, që vazhdojnë të jenë cak i sulmeve të organizuara nga grupe personash të maskuar.
