Agjenti i yllit të Arsenalit, Mesut Ozil, ka deklaruar se nëse klienti i tij do të largohet nga Londra në fund të sezonit do të transferohet te Fenerbahçe.

Reprezentuesi gjerman ka qenë fans i gjigantit turk që nga fëmijëria dhe thuhet se gjatë verës përfaqësuesit e klubit kishin provuar ta transferojnë atë.

“Së shpejti do të shohim çfarë do të ndodhë në fund të sezonit, por nëse ai largohet atëherë Fenerbahçe do të ishte një opsion”, ka thënë Erkut Sogut për Vatan. “Është klub i madh dhe mendoj se Ozil do të thoshte Po për një ofertë të tillë, por është herët të flasim për këtë. Fenerbahçe është serioze, por varet nga përgjigja e Arsenalit. Gjithçka qartësohet në fund të sezonit”. /Telegrafi/