Pas fabrikës në Malishevë e cila prodhonte produkte me marka të njohura botërore, Policia e Kosovës zbulon edhe një fabrikë tjetër në Kosovë, me dyshimin që po shtypen etiketa dhe po prodhohen produkte me firmat “Nike” dhe “Adidas”.Gjatë një aksioni që ka realizuar Policia në Prishtinë, në Çagllavicë dhe në fshatin Konjuh të Lipjanit, janë gjetur prodhime që janë bërë pa autorizimin e kompanive legale, pasi që produktet e firmave “Nike” dhe “Adidas” janë të mbrojtura.
Me këtë rast, Drejtoria për Hetimin e Krimeve Ekonomike dhe Korrupsionit, konkretisht Sektori për Hetimin e Krimeve Ekonomike, në bazë të Urdhëresës së lëshuar nga Gjykata Themelore në Prishtine, pas kontrollit ka gjetur në Çakllavicë ku është edhe fabrika e prodhimit, janë gjetur: 72 palë çorapë të markës “Adidas”; 1400 etiketa me mbishkrimin “Adidas”, 550 etiketa me mbishkrimin “Nike” dhe 750 etiketa me mbishkrimin “Puma”.
Produktet e gjetura janë sekuestruar nga Inspektori Tregut të MTI-së.
Lidhur me këtë rast në cilësi të personit të dyshuar është intervistuar personi B.L (1985), shqiptar nga Kosova, i cili me vendim të prokurorit është liruar në procedurë të rregullt.