Në Ditën Ndërkombëtare për Kujtimin e Viktimave në Trafik, Aleanca për Ardhmërinë e Kosovës përmes një komunikate për media ka vlerësuar se kjo fushë e sigurisë është një ndër sfidat më të paadresuara në Kosovë.

“Numri jashtëzakonisht i madh i aksidenteve në komunikacion, në rend të parë i aksidenteve me fatalitet, dëshmojnë për mungesë të madhe të angazhimit institucional për përmirësimin dhe zhvillimin e sigurisë njerëzore. Siguria në komunikacion, fatkeqësisht, në vitin 2015 është më e ulëta në dekadë” thuhet në komunikatë, transmeton Klan Kosova.

Në këtë komunikatë nga AAK gjithashtu përmendet se qytetarët e Kosovës janë të rrezikuar në mënyrë përditshme në komunikacion, kryesisht si pasojë e mosinteresimit qeveritar për të ndërtuar dhe zbatuar politika për rritjen e nivelit të sigurisë publike.

“Problemet kryesore ndërlidhen me kontrollin fiktiv teknik të automjeteve, abuzimet në lëshimin e patentë-shoferëve, mungesën e sinjalizimeve nëpër rrugë, infrastrukturën jo të plotë rrugore, mangësitë në organizimin e Policisë së Kosovës në aspektin e trafikut, mungesën e dispozitave ligjore për ndëshkim më të lartë të shkelësve të rregullave në komunikacion, si dhe procedurat e ngathëta gjyqësore në këto raste” vazhdon ky njoftim për media.