| Deputetët e Bllokut VLAN (LDK-AAK-Nisma dhe VV) nesër mund ta vënë në skenë aktin e “Kushtetutës së Kaçanikut” dhe të ‘aktrojnë’ rolet e heronjve të 2 korrikut të vitit 1990.
Një paralajmërim i tillë është dhënë sot tërthorazi nga disa deputetët të VLAN-it, derisa është paralajmëruar edhe mbajtja e një takimi të ri të Bllokut nesër para orës 10:00.
Kjo vije si pasojë e shtyrjes së seancës të paralajmëruar për nesër. Ka qenë deputeti i LDK-së, Armend Zemaj ai i cili ka thënë nesër duhet të hapen dyert e Kuvendit, pa marrë parasysh vendimin e kryesueses, Flora Brovina që seanca të shtyhet.
Indeksonline, nga burime të saj brenda bllokut opozitar, mëson se nesër deputetët e VLAN-it mund të
improvizojmë një seancë në hapësirat e lira të kuvendit ose përballë tij, ashtu siç kanë bërë delegatët e Kushtetutës së Kaçanikut.
“Kuptohet në shenjë proteste, sepse vlerësojmë se po i mohohet e drejta shumicës parlamentare për të zgjedhur kryetarin e Kuvendit”, thonë këto burim për Indeksonline.
VLAN vazhdimisht thirret në shumicën parlamentare, kurse PDK-ja në të drejtën që ia jep Kushtetuta për të zgjedhur kreun e Kuvendit. E këto dy pozicione polarizuese, e kanë shtyrë Flora Brovinën që edhe një herë të shtyjë vazhdimin e seancës konstituive, në mënyrë që palët të arrijnë marrëveshje dhe vendi të dalë nga ngërçi politik. /Indeksonline/ |
