Kryetari i Federatës së Futbollit të Kosovës, Agim Ademi, ka thënë se ata kanë vendosur që të mos e lejojnë zhvillimin e ndeshjes mes Trepçës dhe Crvenz Zvezdas në Kosovë, duke shtuar se pret që edhe Policia e Kosovës ta zbatojë këtë vendim.
Federata e Futbollit e Serbisë kishte planifikuar që sot në orën 15:00 të zhvillohet ndeshja mes Trepçës dhe Crvena Zvezdës në Kosovë, në kuadër të Kupës së Serbisë, përkundër që për këtë s’është marrë leje nga Federata e Futbollit e Kosovës, transmeton Gazeta Express.
FFK-ja e ka kundërshtuar pjesëmarrjen e klubeve serbe nga Kosova në garat e Serbisë, duke insistuar se vetëm ajo ka të drejtë të organizojë gara në territorin e Kosovës dhe për këtë tentim të Serbisë për të ndërhyrë në territorin kosovar është ankuar edhe në UEFA e FIFA.
Lojtarët e Crvena Zvezdës u vendosën mbrëmë në Novi Pazar për ta kaluar natën, ndërsa sot në orën 11:00 pritej të jenë në pikën kufitare në Jarinë, ku FFK-ja ka kërkuar nga autoritetet e Kosovës të u ndalohet hyrja serbëve.
“Ne e kemi marrë vendimin tonë, dihet se nuk jemi te pajtimit dhe nuk luhet kjo ndeshje. Është në dorë të policisë dhe presim qe me e zbatue policia këtë vendim. Pritet mos me u zhvillue ndeshja”, ka thënë Ademi për Indeksonline.
Në anën tjetër, drejtori i Trepçës, Bojan Jaksic, ka bërë të ditur se ai ka dërguar kërkesë në Policinë e Kosovës që t’iu lejohet hyrja futbollistëve të Crvena Zvezdas, mirëpo nuk ka marrë përgjigje ndaj kësaj kërkese.
“Si klub, të hënën, i kemi kërkuar Policisë së Kosovës ta lejojnë këtë ndeshje. Kjo është hera e parë që është zyrtare një ndeshje e tillë dhe ne nuk kemi marrë përgjigje në këtë pyetje. Ne mësuam se mund të mos lejohet hyrja e Zvezdas nga mediat. Nuk kemi informata zyrtare”, ka thënë Jasic në një intervistë për RTS.
“Nuk mund të ju them saktësisht kur mund të arrijë Zvezda, mirëpo rreth orës 11:00 do të tentojnë ta kalojnë kufirin dhe ky orar është vendosur më parë. Unë me të vërtetë nuk e di si do të reagojë policia. Ajo që e kemi mësuar nga mediat është se nuk është larguar vendimi për ndalimin e ekipit”. /Gazeta Express/
