Në një ceremoni të organizuar nga Shërbimi Korrektues i Kosovës, përkatësisht stafi i Qendrës Korrektuese në Lipjan, sot u mbajt ceremonia e përurimit të serës për kultivimin e perimeve, në të cilin organizim ka marrë pjesë Ambasadorja e Mbretërisë së Holandës në Kosovë, Gerrie Willems e shoqëruar nga Drejtori i Shërbimit Korrektues të Kosovës, Sokol Zogaj dhe Drejtori i Qendrës Korrektuese në Lipjan, Heset Lloku.

Sera e përuruar në këtë Qendër Korrektuese përfshin një hapësirë prej pesëdhjetë metra katror, projekt ky i financuar nga Agjencioni i Kujdesit Holandez i cili vepron në kuadër të Komitetit Holandez të Helsinkit. Ky projekt është zhvilluar kryesisht me angazhimin e të miturve nga kjo Qendër, synimi i së cilës është që të angazhon të rinjtë në aktivitetet të ndryshme me qëllim të ri-integrimit dhe risocializim më të shpejtë dhe të suksesshëm, transmeton gazeta Kosova Sot Online.