Kur ai u lind më 25 maj 2012, ishte sa madhësia e duarve të babait të tij. Gishtat e duarve i kishte të ngjitur, sytë i hapi vetëm 14 ditë pas lindjes. Ai kishte probleme të mushkërive dhe gjakderdhje në tru. Mjekët i parashikuan vetëm disa orë të jetë. Në maj të këtij viti ai i ka bërë katër vjet.

Bëhet fjalë për një fëmijë, me gjasë nga Serbia i cili ka mbijetuar me gjithë vështirësitë e tija shëndetësore, shkruajnë mediat serbe, përcjell Telegrafi.

Në një rrëfim të tyre në shtëpinë e tij, mediumi serb Blic shkruan se muret dhe raftet rreth banesës janë të mbushur me fotografi të tij dhe artikuj gazetash – lodra në të gjithë banesën – ai ulet në dysheme me nënën e tij dhe të atin me të cilët luajnë – buzëqeshjet e tyre dëgjohen në tërë shtëpinë.

“Vuk, ku je? Vuk?” e pyet nëna e tij, ndërsa ai fsheh fytyrën me duart e tij. Pas disa sekondash, përkul duart e tij dhe me një buzëqeshje thotë “mama”.

Ky djalë ende nuk mund të ecë në mënyrë të pavarur, e vështirë për të parë, por në sajë të përkushtimit të prindërve të tij, ai çdo ditë përparon.

“Këtë vit, mjekët në Itali gjetën se Vuku kishte sulme epileptike disa herë. Gjithashtu, një problem me mushkëritë është ende i pranishëm”, ka shpjeguar për mediat serbe, nëna e tij, Aleksandra Grujiçiq.

Orët e gjata të praktikës janë një pjesë integrale e ditëve të Vukut, përcjell rrëfimin Telegrafi.

“Vuku çdo ditë stërvitet nga rreth gjashtë orë. Vijnë fizioterapisti, terapisti i të folurit, mësues i edukimit special … Por, kur të gjithë mjekët shkojnë, ne merremi me të”, rrëfen nëna Aleksandra.

“Nëse i mbledhim bashkë, rreth tri vite i kemi kaluar nëpër spitale”, shton babai Stojan Grujiçiq.

Megjithatë, djali ende nuk mund të dal në park për të luajtur normalisht me shokët.

“Shpesh ndodh që prindërit u thonë fëmijëve të tyre për të qëndruar larg birit tonë. Kjo na sjell shumë dhimbje, sepse ai është i sëmurë”, rrëfen me dhimbje nëna e tij. /Telegrafi/