Qeveria gjermane së shpejti do të aplikojë një sistem të ri të rezervimeve, pasi që dyshohet për shitjen ilegale të terminëve për aplikimin e vizave në ambasadat gjermane në disa shtete.

Kjo iniciativë ka ardhur pas një raporti nga ana e rrjetit editorial të Gjermanisë (RND). Për këtë, Ministria e Jashtme është duke punuar për një sistem të ri të rezervimeve, i cili do të sigurojë “shfrytëzimin optimal të kapaciteteve përpunuese dhe uljen e rolit të zyrave të dyshimta të vizave”, thuhet në një përgjigje të Qeverisë gjermane, raporton bild.de.

Sistemi është ende në ndërtim e sipër dhe duhet të futet në funksion pas fazës së testimit.

Raportohet se në ambasadat dhe konsullatat në Turqi, Liban dhe Kosovë, për të bërë një kërkesë për vizë gjermane, për shkak të shitjeve të terminëve, njerëzit duhet të presin me muaj të tërë, njofton albinfo.ch.

Vetëm në Liban për të dorëzuar kërkesën për vizë pritjet janë deri në 15 muaj.

Këto vonesa të terminëve bëjnë të mundur shitjen dhe stërshitjen e terminëve për shuma të mëdha parash. /albinfo.ch/