Në Kosova Direkt i ftuar ka qenë këngëtari i njohur, Labinot Tahiri i cili edhe njëherë mori iniciativë që të mbledh fonde humanitare, njofton Klan Kosova.

Kësaj radhe për familjet e prekura nga vërshimet që ndodhën në Maqedoni, dhe në lagjen Hasan Beg në Shkup ku pas vërshimeve pati viktima edhe në njerëz.

Tahiri tha se gjendja e tyre është shumë e keqe dhe të gjithë duhet të marrin iniciativa për ta ndihmuar Maqedoninë.

“Sigurisht që atë që e kemi parë në lagjet e Shkupit, baltën deri në gjunjë tregon se gjendja e tyre është e keqe dhe normalisht që të gjithë duhet të marrim iniciativë për të ndihmuar Shkupin”.

“Aksionin e kam marrë me shumë përgjegjësi dhe iu kam premtuar 10 mijë euro”.

“Shuma e grumbulluar është 11 mijë e 503 euro”.

“Nesër në lagjen “Hasan Beg” do të takohemi me koordinatorët të cilët i kanë gjetur gjashtë lagje në të cilat do t’i ndajmë paratë për 70 familje”.

“Do të shkoj me ta sepse popullata që kanë dhuruar paratë më kanë kërkuar që tu jap personalisht unë paratë në mënyrë që të mos ketë keqpërdorime”.

“Është mirë të shkojmë ta shohim gjendjen aty”, ka thënë Tahiri.