Peticioni si formë e shprehjes së kundërshtimit të qytetarëve ndaj proceseve të ndryshme, në Kosovë ende vazhdon të mbetet i paaplikueshëm. Tashmë kjo është dëshmuar, pasi një numër i madh i peticioneve në vend janë organizuar për të shprehur kundërshtimin e qytetarëve ndaj proceseve të ndryshme, por që nuk janë marrë parasysh nga institucionet e vendit, shkruan gazeta ‘Zeri’.

I fundit, dhe më i madhi i organizuar ndonjëherë, ishte peticioni i tri partive opozitare, Lëvizjes “Vetëvendosje”, Aleancës për Ardhmërinë e Kosovës dhe “Nisma për Kosovën”, kundër nënshkrimit të dy marrëveshjeve, asaj për Asociacionin dhe asaj për Demarkacionin.

Ishin mbledhur mbi 205 mijë nënshkrime të qytetarëve nga mbarë Kosova, e që ishin dërguar në dy institucionet më të larta të vendit, në Presidencë dhe Qeveri. Por asnjëra nga këto institucione nuk e ka marrë seriozisht vullnetin e qytetarëve të shprehur përmes peticionit.

Peticioni i ishte dërguar presidentes së atëhershme Atifete Jahjaga më 23 nëntor 2015. As Qeveria dhe as Presidenca nuk kanë qenë të gatshme të japin përgjigje, edhe pse gazeta ka pritur për dy ditë përgjigje nga këto dy institucione rreth kësaj çështjeje.