Ministri i Jashtëm i Turqisë, Mevlut Cavusoglu, ka konfirmuar sot se vendi i tij i ka ndaluar hyrjen delegacionit të lartë gjerman në territorin e tyre, si përgjigje ndaj miratimit të rezolutës për njohjen e gjenocidit ndaj armenëve në parlamentin gjerman.

“Besojmë se kjo vizitë është e papranueshme”, ka deklaruar Cavusoglu para gazetarëve në Ankara, transmeton Telegrafi.

Autoritetet gjermane kanë njoftuar dje, se Sekretari i Mbrojtjes, Ralf Braukzupe dhe deputetët e Bundestagut gjerman ishin detyruar të anulojnë vizitën e tyre në Turqi, pasi që Ankaraja nuk ka lejuar të aterrojnë në një bazë ushtarake Incirlik.

Në bazën ushtarake në Incirlik në pjesën jugore të Turqisë, është e stacionuar flota ajrore e koalicionit ushtarak ndërkombëtar që është duke luftuar kundër Shtetit Islamik, përfshirë aeroplanë luftarakë gjermanë të tipit “tornado” dhe ata për furnizim.

Pas miratimit të rezolutës për njohjen e gjenocidit ndaj armenëve nga perandoria Osmane në vitin 1915, e miratuar më 2 qershor në Bundestag, Turqia ka tërhequr ambasadorin e saj nga Berlini, derisa presidenti Recep Tayyip Erdogan ka kërcënuar me sanksione Gjermaninë.

Ministri i jashtëm turk Cavusoglu, ka deklaruar se këtë bazë ushtarake mund ta vizitojnë vetëm ekipet ushtarake dhe teknike.