Manifestime të heshtura janë mbajtur në Orlando të Floridës dhe në gjithë botën për viktimat e sulmit vdekjeprurës në një klub të homoseksualëve.

Imami Muhammad Musli, nga Shoqëria Islamike e Floridës, u tha të tubuarve në Orlando se myslimanët janë të bashkuar me ta “kundër ideologjisë së urrejtjes, vdekjes dhe shkatërrimit”.

Tubime të ngjashme janë mbajtur edhe në Francë, Australi, Britani dhe Gjermani.

Sulmi në klubin e natës “Pulse” në Orlando ka lënë të vrarë 49 veta dhe të plagosur dhjetëra të tjerë.

Autoritetet amerikane thonë se sulmuesi Omar Mateen ka shprehur besnikëri ndaj grupit militant Shteti Islamik, transmeton Rel.

Presidenti i Shteteve të Bashkuara, Barack Obama, do të udhëtojë në Orlando të enjten për t’iu bërë nderime viktimave.