Deputetja e lëvizjes Vetëvendosje, Albulena Haxhiu, ka bërë me dije se Prokuroria e Shtetit ka pushuar hetimet ndaj deputetit të LDK-së, Armend Zemaj, për padinë e ngritur nga vetë kjo deputete për hedhje me gotë qelqi gjatë një seance të Kuvendit të Kosovës.

Haxhiu, përmes një statusi në Facebook, ka drejtuar akuza të rënda ndaj sistemit të drejtësisë së Kosovës, sistem të cilin ajo e quan “sistem të padrejtësisë”.

“Sot, me anë të një shkrese nga prokuroria, u njoftova se kjo e fundit paska pushuar hetimet ndaj të pandehurit Armend Zemaj.

Ky sistem i padrejtësisë i cili po ngritë ekspres aktakuza për deputetët opozitarë për veprimet politike në Kuvend nuk e pati guximin të ngrisë aktakuzë kundrejt A.Z, i cili për të mbrojtur Mustafen, gjuajti me gotë qelqi në drejtim të deputetëve të VETËVENDOSJE!-s.

Neve na mbetet ta luftojmë këtë sistem të kapur i cili është vënë në mbrojtje të regjimit autoritar dhe njerëzve që punojnë për të, e gjithashtu të mbrojmë me çdo kusht sovranitetin dhe integritetin territorial” (sic.), ka shkruar Haxhiu.