Banka popullore e Republikës së Maqedonisë informoi se është ulur kërkesa për deviza nga personat fizik, pas rritjes së shënuar të pazakontë gjatë javës së fundit të muajit të kaluar, transmeton Telegrafi Maqedoni.

“Pas masave të ndërmarra nga ana e Bankës popullore – sigurimit të likuiditetit të nevojshëm devizor përmes ndërhyrjeve në tregun devizor dhe rritjes së kamatës bazë më 3 maj të këtij viti, lëvizjet dalëngadalë normalizohen, gjë që shihet nga ulja e vazhdueshme e kërkesës për deviza nga ana e personave fizik, thekson BPRM në informatën e publikuar në faqen e saj.

Paraprakisht, guvernatori i BPRM, Dimitar Bogov, në një intervistë të dhënë për Reuters, ka thënë se tërësisht është ndaluar tërheqja e depozitave nga bankat vendore pas spekulimeve lidhur me krizën politike në Maqedoni. Gjatë muajit prill, siç thekson Bogov, janë tërhequr 1,8 për qind të depozitave në banka, që është rast i parë i tillë pas viteve të shumta të rritjes së vazhdueshme të depozitave./Telegrafi/