Kosova është vendi më infrastrukturën më moderne dhe udhëkryq i rajonit ka thënë Presidenti i Kosovës, Hashim Thaçi, derisa bashkë me ministrin e Infrastrukturës, Lutfi Zharkun, kanë inspektuar punimet e Autostradës “Arbën Xhaferi”, e cila u tha se do të përfundojë në janar të vitit 2018, njofton Klan Kosova.

Për autostradën e re që përshkon rrugën Prishtinë-Han i Elezit, Thaçi deklaroi se po punohet me standarde europian dhe në mënyrë intensive ashtu siç ishte dhe plani i Qeverisë së Kosovës.

“Këto projekte bëjnë Kosovën më moderne, më europiane dhe më të gatshme për proceset që e presin në të ardhmen”, ka thënë Thaçi, duke shtuar se me marrjen e liberalizimit të vizave dhe proceset tjera rriten edhe përgjegjësitë “prandaj institucionet po punojnë që projekte madhore si autostrada e re të kryhen në afate rekorde”.

Edhe ministri Zharku, njëjtë si Presidenti, ka deklaruar se rruga do të kryhet në afat dhe ka folur për projekte të tjera infrastrukturore.

Ndërkaq, ndërtimi i Autostradës “Arbën Xhaferi” e njohur si “Rruga 6” ka nisur në fillim të muajit korrik 2014. Segmenti i parë i autostradës “Arbën Xhaferi” është përuruar në tetor të vitit 2015. Kontrata është nënshkruar në mes të Ministrisë së Infrastrukturës dhe kompanisë Bechtel-Enka në vlerë prej 599,944,263.55 euro, në të cilën vlerë është përfshirë edhe TVSH-ja. Gjatësia e përgjithshme e projektit është afërsisht 60 km, kurse afati i realizimit të projektit është 42 muaj.

Në bazë të kontratës së lidhur ndërmjet Qeverisë së Kosovës dhe kompanisë Bechtel Enka, një kilometër autostradë kushton 10 milionë euro. Fizikisht projekti është i ndarë në tre seksione: Seksioni i parë (C1) Udhëkryqi i autostradave “IR” dhe “AXh” (R6/R7-N2) – Kyçja Konjuh – Kyçja Babush; Seksioni i dyte (C2) kyçja Babush – kyçja Doganaj – Kacanik; Seksioni i tretë (C3) kyçja Doganaj Kaçanik – Hani i Elezit. /Telegrafi/