Luis Suarez është stërvitur me bashkëlojtarët e rinj të Barcelonës për të parën herë pasi Gjykata e Arbitrazhit Sportiv i dha atij dritë të gjelbër gjatë të enjtes.

Uruguaiani aktualisht është duke shërbyer suspendimin prej katër muajsh nga futbolli pasi kafshoi mbrojtësin italian Giorgio Chiellini gjatë ndeshjes mes dy kombëtareve në Kupën e Botës.

FIFA në fillim e përjashtoi atë nga të gjitha aktivitetet e futbollit, përfshirë stërvitjet, por pas ankesës, GJAS tha se ai mund të luajë në miqësore dhe të stërvitet normalisht.

Barelona menjëherë zbuloi se ish-sulmuesi i Liverpoolit do të fillojë të stërvitet qysh sot (e premte), derisa mund të bëjë paraqitjen e parë në ndeshjen e të hënës ndaj skuadrës Leon, një miqësore e vlefshme për trofeun Gamper. /Telegrafi/