Presidenti i Republikës së Kosovës, Hashim Thaçi, ka pritur sot një delegacion nga Italia, të kryesuar nga ministrja italiane e Mbrojtjes, Roberta Pinotti.

Presidenti Thaçi e falënderoi ministren Pinotti për bashkëpunimin shumë të mirë që Kosova ka me Italinë.

Ai u shpreh se Kosova është kthyer në faktor stabiliteti në rajon dhe është lidere në luftimin e ekstremizmit dhe të terrorizmit.

Duke folur për të arriturat në fushën e sigurisë, presidenti Thaçi tha se falë masave që kanë marrë autoritetet kosovare, në gjashtë muajt e fundit nuk është regjistruar asnjë kosovar i ri që u është bashkuar grupeve terroriste në Siri dhe Irak.

Ministrja Pinotti tha se është e kënaqur me rolin që luan Italia në Kosovë dhe u shpreh në favor të bashkëpunimit në fushën e sigurisë dhe të luftimit të ekstremizmit dhe terrorizmit.

Presidenti Thaçi kërkoi që të përkrahet anëtarësimi i Kosovës në institucionet e sigurisë, siç është Interpoli, që komunikimi dhe bashkëpunimi të jetë më i shpejtë dhe më efikas. /Telegrafi/