Aleanca për Ardhmërinë e Kosovës ka sqaruar se nuk e ka në plan të hyjë në këtë qeveri, por mund të bëhet pjesë e një qeverie, vetëm pas zgjedhjeve.

Përmes një reagimi për media, AAK sqaron se as njerëzit e AAK-së, e as Ramush Haradinaj, nuk kanë pasur biseda me Kadri Veselin, as me eksponentë të LDK-së, as me ndërkombëtarë, për t’u bërë pjesë e Qeverisë.

“Të gjitha informatat për këtë  janë një rrenë e madhe”, thuhet në reagim.

Po ashtu thuhet se AAK me asnjë çmim nuk do të bëjë veprime, që do ta rehabilitonin dhe do ta amnistonin qeverinë aktuale, nga ajo që e konsiderojnë agresion në sistemin kushtetues dhe territorit të vendit.

“Krejt çka kërkojmë nga kjo Qeveri, është që ajo të japë llogari për veprimet antikushtetuese, të japë dorëheqje dhe t’i hapë rrugë zgjedhjeve të reja!”, thuhet në reagim. /Telegrafi/