Seanca e Kuvendit Komunal në Lipjan, e cila ishte parapar të mbahej sot, është ndërprë pasi ka filluar për shkak të kuorumit.

Komuna e Lipjanit ka njoftuar se mbledhja e 9-të e Kuvendit të Komunës së Lipjanit ndërpritet për mungesë kuorumi.

“Pas pauzës së drekës, mbledhja nuk vazhdoi për shkak të mungesës së kuorumit në sallë”, thuhet tutje.

“Në këto rrethana, Kryesuesi i Kuvendit z. Daut Azemi, njoftoi ndërprerjen e punimeve të seancës, ndërsa bëri të ditur se anëtarët e Kuvendit do të njoftohen me kohë për vazhdimin e saj”, ka njoftuar Komuna e Lipjanit.

Nga ana tjetër, PDK-Lipjan ka reaguar në lidhje me mos vazhdimin e seancës.

“Ajo që ndodhi sot në Kuvendin e Komunës së Lipjanit është një veprim që kërkon sqarim institucional dhe juridik”, thuhet nga PDK.

“Kryesuesi i Kuvendit, pasi filloi shqyrtimi i një pike të rendit të ditës dhe pasi anëtarët kishin filluar diskutimet, vendosi ta ndërpresë seancën në mënyrë të njëanshme, pa një pajtim paraprak me shefat e grupeve parlamentare. Kjo ngjarje ngre seriozisht çështjen e respektimit e Ligjit për Veteverisje Lokale, Statutit të Komunës dhe Rregullores së Punës së Kuvendit, të cilat përcaktojnë mënyrën e thirrjes, udhëheqjes dhe zhvillimit të mbledhjeve”, thuhet tutje.

“Për këtë arsye, Grupi i PDK-së do t’u drejtohet institucioneve kompetente, përfshirë ministrinë përkatëse, për të kërkuar vlerësim dhe sqarim ligjor mbi këtë veprim. PDK në Kuvendin e Lipjanit është unike, e bashkuar dhe e palëkundur. Ne nuk votojmë buxhetin e qytetarëve për interesa të ngushta politike, personale apo klanore. Buxheti është i qytetarëve të Lipjanit, jo i pushtetit. Ne do të vazhdojmë të kërkojmë transparencë, llogaridhënie dhe respektim të rregullave të Kuvendit. Kur nuk i ke votat, nuk mund ta ndalësh demokracinë me ndërprerjen e seancës, thuhet në komunikatë.

Tutje siq njoftoi Komuna e Lipjanit, gjatë seancës u shqyrtuan pikat e rendit të ditës sipas agjendës së paraparë. Në kuadër të punimeve të seancës, Kuvendi miratoi edhe Deklaratën lidhur me procesin gjyqësor në Hagë, me ç’rast kuvendarët shprehën pakënaqësinë e tyre lidhur me trajtimin dhe dënimin të cilin e konsideruan të padrejtë, ndaj një pjese të krerëve të UÇK-së.

Gjithashtu kuvendarët u bëjnë thirrje organeve shtetërore në nivel nacional që të bashkërendojnë veprimet e mëtejshme lidhur me situatën aktuale, me qëllim të mbrojtjes dhe ruajtjes së vlerave të UÇK-së.

Në këto rrethana, Kryesuesi i Kuvendit z. Daut Azemi, njoftoi ndërprerjen e punimeve të seancës, ndërsa bëri të ditur se anëtarët e Kuvendit do të njoftohen me kohë për vazhdimin e saj.