Një konflikt në mes të besimtarëve dhe hoxhës në njërën nga xhamitë e shqiptarëve që ka ndodhur mesdirën e të dielës në Winterthur (Grüze) ka alarmuar policinë.

E njoftuar nga një “qytetar i shqetësuar”, siç shkruan 20minuten.ch, patrulla e përbërë nga disa makina policore ka shkuar në hapësirën ku ndodhet xhamia.

Sipas kreut të policisë që ka udhëhequr aksionin, në oborrin e xhamisë dhe brenda saj mbretëronte një atmosferë e tendosur në mes të pranishmëve. Por, konflikti është kufizuar “pakashumë brenda suazave verbale”, ka thënë ai, transmeton albinfo.ch.

E gjithë ajo çfarë ka bërë policia aty ka qenë ndërhyrja për pajtim dhe për ulje të gjakrave.

Policia nuk ka dhënë informata plotësuese për shkakun e zënkës. “Kjo është punë e hetimeve”, ka thënë kreu i aksionit policor. Ai ka shtuar se është zhvilluar edhe kontrollimi i zakonshëm i të pranishmëve, siç praktikohet në raste të tilla. Askush nuk është arrestuar me këtë rast.

Siç shpjegon për albinfo.ch një burim që nuk ka dashur t`i përmendet emri, ky konflikt ka të bëjë me mosmarrëveshjen në mes të imamit të xhamisë dhe kryesisë së saj. Personi i kontaktuar, aktivist i vjetër dhe njëri ndër themeluesit e kësaj xhamie thotë se kjo nuk është hera e parë që është dashur  të ndërhynte policia në këtë Konflikt.

Aty janë përfshirë imami me një pjesë të besimtarëve në njërën anë, dhe shumica e madhe e besimtarëve, në anën tjetër. Burim i konfliktit thotë ai për albinfo.ch ka qenë vendimi i kryesisë që hoxhës t`i shkëputet marrëdhënia e punës. Ai nuk ka dashur ta pranojë këtë vendim dhe ka marrë avokatin mbrojtës si dhe është duke “u shtyrë” me gjyq, thotë burimi për albinfo.ch.