Xhavit Haliti, nënkryetar i Kuvendit të Kosovës, ka deklaruar se Organi Shqyrtues i Prokurimit duhet të shuhet. Sipas tij, ekzistojn arsye e mjaftueshme për mbylljen e këtij institucioni shtetëror.
Ai në një intervistë për gazetën “Zëri” ka thënë se OSHP është shndërruar në qendër të korrupsionit. Organi Shqyrtues i Prokurimit është bërë temë debati pas kërkesave të BE-së ndaj Qeverisë dhe Kuvendit të Kosovës për të vënë rregull në këtë institucion.
Më pas pasoi dorëheqja e Hysni Hoxhës, kreut të deritashëm të OSHP-së. Hoxha deklaroi se dha dorëheqje për arsye përsonale por mediat raportuan se ai përfilli kërkesën e kryeparlemntarit Kadri Veseli.
Pozita ka bërë lëvizje për të emëruar anëtar të rinj në bordin e OSHP-së. Përkundër mos pjesëmarrjës së opozitës, koalicioni PDK-LDK nuk arriti të miratoj emrat e propozuar nga Qeveria e Kosovës për anëtar bordi në OSHP.
Ky institucion, mbylljen e të cilit e kërkon Haliti, që prej themelimit është udhëhequr nga Hysni Hoxha, ish-ligjvënës komunal në Prizren i Partisë Demokratike të Kosovës.
Përveç çështjes së OSHP-së, Haliti në intervistën për Zërin ka folur edhe për bojkotin e opozitës.
“Unë mendoj që ata këtë veprim e kanë bërë pa e studiuar mirë dhe shpresoj që do ta rishikojnë vendimin e tyre dhe të kthehen në Parlament, jo për hir të pozitës, por për hir të vetvetes dhe për hir të Kosovës dhe demokracisë në Kosovë. Një Parlament pa zërin e opozitës është i mangët gjithmonë dhe do ta zbehë demokracinë e re të Kosovës”, ka deklaruar Haliti.
