Emisari i BE’së për Ballkanin Perëndimor, Miroslav Lajçak, përgjegjës për bisedimet Kosovë-Serbi, ka thënë se shoqëritë në Kosovë e Serbi s’bëjnë presion për normalizim të raporteve Kosovë-Serbi. Për më tepër, sipas tij, sa herë që Kurti e Vuçiq bëjnë ndonjë hap, ka kritika në vendet respektive.

I pyetur nga N1 Bosnia se cili ka qenë problemi më i madh me të cilin është përballur në negociata, Lajçak ka thënë se “problemi kryesor është se procesi duhet të çojë në normalizimin e marrëdhënieve”.

“Së fundmi kam pasur një takim me përfaqësues të organizatave joqeveritare dhe mediave nga rajoni. I pyeta se kush e do normalizimin? Dhe përgjigja ishte ju, Bashkimi Evropian. Pra, problemi është se ky është një proces që është bërë i mundur nga BE-ja, por ne nuk e ndjejmë përpjekjen, presionin për normalizim nga ana e shoqërive, as në Serbi e as në Kosovë. Pra, ne kemi një marrëveshje që nuk e kemi pasur kurrë më parë, Marrëveshja e Ohrit, e cila është një rrugë e qartë. Por ajo që kam dëshmuar gjithashtu është se sa herë që dy liderë, presidenti Vuçiq, kryeministri Kurti, bien dakord për disa hapa drejt normalizimit, ajo përballet me kritika në shoqëritë e tyre” ka thënë Lajçak.

“Pra, është e qartë se elementi më i rëndësishëm për të përfunduar këtë proces është të ndihmojmë shoqëritë të kuptojnë se pa normalizimin e marrëdhënieve të tyre nuk ka të ardhme evropiane për to”, ka shtuar ai.

Sipas tij, Bashkimi Evropian nuk ka qenë kurrë më i gatshëm për ta udhëhequr këtë proces apo për ta lehtësuar këtë proces.

“Megjithatë, më duhet të them se katër vitet e mandatit tim u ndanë realisht në dy pjesë. Njëra ishte pozitive kur po punonim për normalizimin, por tjetra, që ishte më e madhe, fatkeqësisht po përballej me krizën në terren, duke zbutur ndikimin, duke u përpjekur të parandalonte përshkallëzimin. Dhe sigurisht, nuk mund t’i kesh të dyja në të njëjtën kohë. Kështu që shumë shpesh ne detyroheshim të ndalonim procesin e normalizimit sepse duhej të përballeshim me përshkallëzimin në terren”.

Emisari ka theksuar se tani çështja më e madhe është se si të “të zbutet ndikimi i vendimit të Bankës Qendrore të Kosovës në transaksionet me para të gatshme”.

“Sigurisht, kjo është ajo që aktualisht po zë më shumë vëmendjen tonë. Pra, për fat të keq, ky është një realitet që është produkt i një niveli shumë të ulët të besimit mes dy shoqërive, ndërmjet Kosovës dhe Serbisë në përgjithësi”./Gazeta Express