Një grua që po mbytej në det bashkë me vajzën e saj është shpëtuar nga oficeri i FSK-së.

Ngjarja ka ndodhur në plazhet e qytetit të Shëngjinit në Shqipëri, ku nënkoloneli Bexhet Shala ishte për pushime me familjen e tij.

Intervenimi i nënkolonelit kishe ardhur pasi ai kishte vërejtur lëvizje jonormale të dy personave, F.Berisha dhe R.Berisha që ishin në ujë, me një distancë prej rreth 70 metrash.

“Unë kam bërë vetëm detyrën. Ne si ushtarakë të FSK-së, e kemi mision që çdo herë të jemi në gatishmëri për t’u përgjigjur situatave që kërkohen që të jemi të gatshëm të ndihmojmë këdo, pa dallim, deri në vetëmohim”, ka theksuar nënkolonel Bexhet Shala.

Nënkolonel Bexhet Shala ka marrë falënderime të shumta nga familja Berisha, për veprën e tij humane, në shpëtimin e jetëve të të dy familjareve të tyre.