Një numër i protestuesve serbë janë mbledhur në tri komunat veriore, Zubin Potok, Leposaviq dhe Zveçan, për të penguar hyrjen e kryetarëve të zgjedhur, në ndërtesat komunale.

Si pasojë pesë policë u lënduan, nga hedhja e mjeteve të forta dhe shok bombave nga ana e protestuesve.

Gjithashtu katër veturave janë dëmtuar, derisa njërës i është vënë zjarri.

“Duke parë rrezikun e drejtpërdrejtë të jetës së zyrtarëve policorë, njësitet policore relevante në vetëmbrojtje janë detyruar të reagojnë dhe të përdorin mjetet e ligjshme, përfshirë gazin lotsjellës për shpërndarje të turmës, dhe për t’ua mundësuar hyrjen kryetarëve në objekte komunale”, thuhet në njoftimin e policisë përcjell Klankosova.tv

“Lidhur me veprimet e deritanishme Policia ka bashkëpunuar dhe koordinuar veprimet me organet e drejtësisë, të cilët rastin e kanë cilësuar si “Sulm Kundër Rendit Kushtetues”. Policia e Kosovës do të vazhdojë të mbajë një ambient të sigurt dhe të qetë për të gjithë qytetarët e Republikës së Kosovës pa dallim, si dhe do të ndërmarrë masa ligjore ndaj veprimeve të kundërligjshme, që në çfarëdo mase do të rrezikonin sigurinë, qetësinë dhe stabilitetin në vend”, thuhet në njoftim.