Ashpërsimi i gjuhës në mes ish-bashkëluftëtarëve të Ushtrisë Çlirimtare të Kosovës (UÇK) dhe shkëmbimi i akuzave ndaj njëri tjetrit, sipas publicistit Halil Matoshi, e kanë bazën te morali dhe të bëmat e kohës se paraluftës.
Matoshi ka thënë për Telegrafin se “diskursi agresiv që ka shpërthyer aktualisht, e ka historinë dhe moralin e vet tek periudha e pasluftës”.
“Kur për pushtet dhe para u goditën vlerat fondamentale të kësaj shoqërie, sado të brishta që ishin: besa, burrëria, durimi, gajreti, duke i zëvendësuar nga pabesia, mburravecëria, mësymja agresive për ta koritë tjetrin, zemërimi etj”.
Ai ka theksuar se periudha kaotike e pasluftës dhe etablimi i njerëzve të fuqishëm por të padijshëm në pushtet, nga një shoqëri paqësore krijoi, sipas tij, monstrumë dhe agresorë të verbër – sa që siç thotë Matoshi, pothuajse për pak ditë (mars 2004) i shndërruan shqiptarët kosovarë nga viktima në xhelatë të harbuar.
“Pabesitë, pritat e mizoritë po na i shpërfaqin tash në sytë e botës vetë akterët, që veten e kanë quajtur komandantë lufte, e tash le të del dikush e le ta demantojë një Dick Marty apo një Williamson e të na bind se ky soj njerëzish qenkan sjellur vërtet si kushërinj të Nënës Terezës”, ka shtuar ai.
Matoshi ka thënë se “publiku kosovar është bombarduar me një diskurs agresiv – këto ditë – që nga thirrja për luftë vëllavrasëse e Hashim Thaçit e deri tek iftiret ndaj njëri tjetrit të Ramiz Lladrovcit dhe Rexhep Selimit e Gani Gecit, si dhe tregimet që po shpalosen rreth Xhabir Zharkut, për vrasjen në pritë të bashkëluftëtarëve”.
Ai mendon se rivaliteti i gjatë politik dhe mospërmbushja e tyre në këtë fushë të panjohur për ta, për shkak të së kaluarës së dhunshme dhe joqytetare të tyre, i ka bërë këto figura të luftës sipas tij, që të kalojnë nga euforia në fazën maniako-depresive.
“Natyrisht se tek ta, po shfaqet frika nga njëri tjetri sepse kodi i tyre është pabesia. Pra ata frikësohen se tjetri ka për të folur – sidomos tash – kur Gjykata Speciale mund të funksionalizohet”, ka shtuar Matoshi. /Telegrafi/
