Sergi Roberto dhe Barcelona raportohet se kanë arritur marrëveshje për zgjatje të bashkëpunimit.

Spanjollit i skadoi kontrata verën e kaluar, por e zgjati edhe për një sezon duke pranuar edhe ulje të pagës. Tani me kontratën e re, nuk dihet nëse dhe sa rritje ka marrë, transmeton Gazeta Express.

Sipas ekspertit të transferimeve, Fabrizio Romano, marrëveshja e plotë mes palëve për rinovim të kontratës është arritur tashmë, teksa po përgatiten edhe dokumentet për t’u nënshkruar.

Kontrata e re e Robertos do të jetë e vlefshme deri në qershor të vitit të ardhshëm.

Trajneri Xavi  thuhet se i kërkoi klubit të zgjasë kontratën e 31-vjeçarit.

Sergi Roberto është pjesë e ekipit të parë të Barcelonës nga viti 2013. Ai ka regjistruar në total 334 paraqitje deri më tani, ka shënuar 14 gola dhe ka kontribuar me 39 asistime. /Gazeta Express/