Këtë vit është shënuar numër rekord i 376 kandidatëve që garojnë për çmimin Nobel të Paqes, kanë bërë të ditur sot nga Instituti Nobel që mban të fshehtë emrat e të nominuarve.
Rekordi i mëparshëm ishte shënuar gjatë vitit 2014, kur ishin propozuar 278 emra. Edhe pse Instituti Nobel nuk i publikon emrat e kandidatëve, besohet se në listën e sivjetme figurojnë personalitete të ndryshme, siç janë kandidati republikan për president të Shteteve të Bashkuara, Donald Trump, ish-bashkëpunëtori i Agjencisë së Sigurisë Kombëtare, Edward Snowden dhe Papa Françesku, transmeton Telegrafi.
“Kjo pasqyron faktin se po jetojmë në një botë ku ka shumë konflikte, në të cilat ekzistojnë një numër i proceseve që shkojnë në drejtim pozitiv. Natyrisht se e gjithë kjo ka frymëzuar shumë njerëz të përdorin të drejtën e tyre, dhe të kandidojnë për çmim”, ka deklaruar drejtori i Institutit Nobel në Oslo, Olav Njelstad.
Gjithashtu besohet se në garën e sivjetme janë edhe kandidati për president të Shteteve të Bashkuara, Donald Trump, Papa Françesku, kancelarja gjermane Angela Merkel, banorët e ishujve grekë që po ndihmojnë emigrantët dhe aktorja amerikane Susan Sarandon.
Në liste besohet se figuron edhe emri i gjinekologut kongolez, Denis Mukvege, Nadia Murad nga grupi etnik Yazidis e cila ka ikur nga Shteti Islamik e cila ka qenë e zënë rob si skllave seksi, aktivistët kundër armëve bërthamore, përfaqësuesja e çiklisteve afgane.
Ndërsa, pesë anëtarët e komitetit të Nobel sot kanë zhvilluar një takim për zgjedhjet e këtij viti. /Telegrafi/
