Enzo Fernandez mund që së shpejti të ndryshojë ambient pasi që për të kanë shprehur interesim disa klube, pas paraqitjeve të tij të mira me Argjentinën në Kupën e Botës “Katar 2022”.
Mesfushori, i cili u zgjodh lojtari më i mirë i ri në atë turne, thuhet se ka tërhequr interesimin e Real Madridit dhe Liverpoolit, transmeton Gazeta Express.
Madje, sipas “Record”, Benfica ka refuzuar një ofertë prej 100 milionë eurosh për Fernandezin. Mediumi portugez nuk e zbuloi emrin e klubit që bëri këtë ofertë.
Klubi nga elita e futbollit të Portugalisë thuhet se nuk do të pranojë asnjë ofertë nën 120 milionë euro, çmim i cili është edhe në klauzolën e lirimit të 21-vjeçarit.
Vlen të theksohet gjithashtu se ish-klubi i argjentinasit, River Plate, do të përfitojë 25% nga tarifa e shitjes totale të lojtarit.
Enzo Fernandez me Benfican ka kontratë të vlefshme deri më 30 qershor 2027. /Gazeta Express/
