Nënkryetari i AAK-së, Ardian Gjini ka lëshuar akuza të rënda në drejtim të PDK-së dhe LDK-së.

Për PDK-në Gjini ka thënë se udhëhiqet nga kupola e korrupsionit dhe krimit të organizuar, kurse për LDK-në ka thënë se udhëhiqet nga fundërrinat.

Lexojeni të plotë postimin e Gjinit në Facebook:

“Udhëheqësit e PDK po që janë kupola e korrupsionit dhe krimit të organizuar. Askush nuk e ka asnjë dilemë për këte, madje as ata që i mbështesin.

Por puna të paktën poaq keq po del edhe me LDK.

Njerëzit që e mbajnë pushtetin e LDK janë njerëzit më të pandershëm dhe më të pafytyrë në cilindo rast.

Kanë fituar vota duke e luajtur rolin e viktimës, kjo është e vërtetë. Por tani, nëse kanë qenë viktimë dhe i votojnë kriminelët që vet i kanë akuzuar gjatë gjithë kohës, janë qyqarë të pandershëm, të korruptuar dhe të pagjak. E nëse kanë akuzuar pa pasur fakte vetëm sa për të fituar vota, janë qyqarë, të korruptuar, gënjeshtarë, kundërinstitucionalistë dhe antikombëtarë.

Me pak fjalë, nëse SHIK apo kushdoqoftë tjetër i ka vra e këta bëhen me ta, janë fundrrina.

E nëse SHIK apo kushdoqoftë nuk i ka vra e këta i kanë akuzuar pa fakte, prapë janë fundrrina.

Duhet të ketë moral në politikë! Dhe do të ketë. Shpejt e merrni vesh.

Në cilindo variant, shumë bre të lig u treguat!

Mos shitni kopalla për asgjë kurrë më.

Kur po e shoh çfarë jeni në gjendje të bëni, nuk do të befasohesha fare nëse del se vrasësit janë nga rradhët tuaja” (sic), ka shkruar Gjini.